ஓடுகளத்தில்
நினைவுகள் துரத்த
நினைவுகள் ஓடுகின்றன

அதை நினைவுகள்
காலரியில் இருந்தும்
லைவ் டெலிகாஸ்ட்டிலும்
பார்வை இடுகின்றன

போட்டியின் நடுவராகவும்
நினைவுகளே நியமிக்கப்பட்டுள்ளன

வெற்றி பெற்ற நினைவுகளை
கார்ப்பொரேட் நினைவுகள்
வியாபார யுத்தியாக
விளம்பரப் படங்களுக்கு
புக்கிங் செய்கின்றன

வேண்டுமென்றே
தோற்ற நினைவுகளுக்கு
பின்புலத்தில்
மேட்ச் பிக்ஸிங் நினைவுகளின் வெகுமதிகள்
வெளிநாட்டு கரன்சிகளில் வழங்கப்படுகின்றன

தோற்ற நினைவுகளும்
வென்ற நினைவுகளும்
வெளிநாட்டு ஹோட்டல் பார்களில்
கை குலுக்கி
ஷாம்பெய்ன் குலுக்கி
உனக்கு எவ்வளவு லாபம்
எனக்கு எவ்வளவு லாபம்
-என கணக்குப் பார்க்கின்றன

அடுத்த முறை
யார் ஜெயிப்பது
யார் தோற்பது?
மேட்ச் பிக்ஸிங்கில்
இன்னும் அதிகம் கொடுக்க
முன்வரும்
எந்த மேட்ச் பிக்ஸரை
ப்ரொமோட் செய்வதென்று மேட்ச் பிக்ஸர்களையே
பிக்ஸிங் செய்கின்றன


© iAmRangz